Semavic® Next — semaglutid faol moddasini o‘z ichiga olgan vazn yo‘qotish va tana vaznini saqlash uchun mo‘ljallangan preparat. Semaglutid inson glyukagonga o‘xshash peptid 1 (GPP-1) ning analogi bo‘lib, ovqat iste’molidan so‘ng ichakdan ajralib chiqadi. Semavic® Next bosh miyadagi ishtahani boshqaruvchi retseptorlarga ta’sir ko‘rsatib, o‘zingizni to‘q va kamroq och his qilishingizga, shuningdek, ovqatga bo‘lgan ishtiyoqni pasaytirishga olib keladi. Bu sizga kamroq ovqatlanish va vaznni kamaytirish imkonini beradi. Semavik® Next past kaloriyali parhez va jismoniy faollikka qo‘shimcha sifatida tavsiya etiladi.

Qo‘llash bo‘yicha ko‘rsatmalar

Semavic® Next preparati tana vaznini nazorat qilish, jumladan vaznni kamaytirish va saqlash uchun past kaloriyali parhez va jismoniy mashqlarga qo‘shimcha ravishda 18 yoshdan oshgan kattalarda qo‘llash uchun buyuriladi. Bu quyidagi boshlang‘ich tana massasi indeksi (TMI) bo‘lgan kattalarga taalluqli:

• ≥ 30 kg/m² (semizlik)
• ≥ 27 kg/m2, lekin < kg/m2 (tana vaznining oshishi) holati bo‘lganda, tana vazni bilan bog‘liq kamida bitta qo‘shimcha kasallik, masalan, disglikemiya (diabet oldi holati yoki 2-tur qandli diabet (QD2)), arterial gipertenziya, dislipidemiya, uyqudagi obstruktiv apnoe yoki yurak-qon tomir kasalliklari mavjud bo‘lsa.

Semavic® Next preparati yurak-qon tomir kasalliklari va semizlik yoki ortiqcha tana vazni aniqlangan 18 yoshdan oshgan kattalarda katta yurak-qon tomir hodisalari rivojlanish xavfini kamaytirish uchun qo‘llashga ko‘rsatilgan*.

^*Katta yurak-qon tomir hodisalariga quyidagilar kiradi: yurak-qon tomir kasalligi tufayli o‘lim, o‘limga olib kelmaydigan miokard infarkti, o‘limga olib kelmaydigan insult.

Agar ahvolingiz yaxshilanmasa yoki yomonlashayotganini his qilsangiz, shifokorga murojaat qilishingiz lozim.

Qarshi ko‘rsatmalar

Quyidagi holatlarda Semavic® Next, preparatini qo‘llamang:

• semaglutidga yoki preparat tarkibiga kiruvchi va 6-bo‘limda sanab o‘tilgan yordamchi moddalarning istalganiga o‘ta sezuvchanlik;
• anamnezda qalqonsimon bezning medullyar saratoni, shu jumladan oilaviy holatlari;
• 2-tur ko‘p endokrin neoplaziya (KEN);
• 1-turdagi qandli diabet (QD1);
• diabetik ketoatsidoz;
• og‘ir darajali jigar yetishmovchiligi;
• buyrak yetishmovchiligining oxirgi bosqichi (kreatinin klirensi (CC) < ml/daq);
• surunkali yurak yetishmovchiligi (SYuY) IV-funktsional sinf (NYHA – Nyu-York yurak assotsiatsiyasi) tasnifiga ko’ra).

Maxsus ko‘rsatmalar va ehtiyot choralari

Semavic® Next preparatini qo‘llashdan oldin davolovchi shifokoringiz bilan maslahatlashing.

Quyidagi holatlardan birortasi sizga tegishli bo‘lsa, albatta davolovchi shifokoringizni ogohlantiring:

• agar sizda oshqozon-ichak tizimi tomonidan buzilishlar mavjud bo‘lsa
  Semavic® Next bilan davolanish paytida sizda ko‘ngil aynishi, qusish yoki ich ketishi kabi oshqozon-ichak tizimi (OIT) tomonidan nojo‘ya ta’sirlar paydo bo‘lishi mumkin. Bu suvsizlanishga (suyuqlik yo‘qotilishiga) olib kelishi mumkin va kamdan-kam hollarda buyrak faoliyatining yomonlashishiga sabab bo‘lishi mumkin. Suvsizlanishning oldini olish uchun yetarli miqdorda suyuqlik ichishingiz juda muhim. Agar sizda buyrak bilan bog‘liq muammolar bo‘lsa, bu ayniqsa muhimdir.
• Agar sizda ilgari pankreatit (oshqozon osti bezi yallig‘lanishi) bo‘lgan bo‘lsa
• Agar sizda quyidagilar paydo bo‘lsa qorinda kuchli va davomli og‘riq, jig‘ildon qaynashi, ko‘ngil aynishi yoki qusish, umumiy ahvolning yomonlashuvi kuzatilsa, darhol shifokorga murojaat qiling, chunki bu o‘tkir pankreatit (oshqozon osti bezi yallig‘lanishi) belgisi bo‘lishi mumkin.
• Agar sizda xoletsistit (o‘t pufagining yallig‘lanishi) belgilari paydo bo‘lsa - o‘ng qovurg‘a ostidagi og‘riq (u yelka, kurak yoki o‘mrovga tarqalishi mumkin), ko‘ngil aynishi, kekirish, ko‘z oqi yoki terining sarg‘ayishi, terining qichishi.
• Agar sizda 2-tur qandli diabet mavjud bo‘lsa
  Semavic® Next insulinning o‘rnini bosa olmaydi.
  Semavic® Next preparatini GPP-1 retseptorlarining boshqa agonistlari bilan birga ishlatmang, chunki bu nojo‘ya ta’sirlarning kuchayishiga va dozaning oshib ketishiga olib kelishi mumkin.
• Agar siz sulfonilmochevina hosilalari yoki insulin preparatlarini qabul qilayotgan bo‘lsangiz. Ushbu dori vositalarining Semavic® Next bilan birgalikda qo‘llanilishi qondagi qand miqdori pasayishi (gipoglikemiya) xavfini oshirishi mumkin. Sulfonilmochevina yoki insulin preparatlari dozasini kamaytirish zarur bo‘lishi mumkin, shu sababli davolovchi shifokoringiz bilan maslahatlashing.
• Agar sizda diabetik retinopatiya (qandli diabetga bog‘liq ko‘z kasalligi) bo‘lsa Qondagi qand miqdorini nazorat qilishning tez yaxshilanishi diabetga bog‘liq ko‘z kasalligining vaqtinchalik kuchayishiga olib kelishi mumkin. Ko‘rish bilan bog‘liq muammolarga duch kelsangiz, shifokoringizga murojaat qiling.

Agar sizda quyidagi holatlar/kasalliklar mavjud bo‘lsa, samaradorlik va xavfsizlik to‘g‘risidagi ma’lumotlar yetarli bo‘lmaganligi yoki qo‘llash tajribasi cheklanganligi sababli Semavic® Next preparatini qo‘llash tavsiya etilmaydi:

• vazn kamaytirishga mo‘ljallangan boshqa dori vositalarini qo‘llash;
• 1-turdagi qandli diabet;
• og‘ir darajadagi jigar yetishmovchiligi;
• surunkali buyrak yetishmovchiligining terminal bosqichi;
• IV funksional sinfdagi surunkali yurak yetishmovchiligi (SYuYe) (NYHA tasnifiga ko‘ra).

Quyidagi holatlarda Semavic® Next preparatini ehtiyotkorlik bilan qo‘llang:

• 75 yoshdan yuqori bo‘lsangiz;
• yengil yoki o‘rtacha darajadagi jigar yetishmovchiligida;
• ichak yallig‘lanish kasalliklarida;
• oshqozonni diabetik parezida.

Aspiratsiya yoki aspiratsion pnevmoniya xavfi

GGP-1 agonistlarini qabul qilayotgan bemorlarda umumiy narkoz yoki chuqur sedatsiya ostida jarrohlik amaliyotlari o‘tkazilganda, oshqozon bo‘shalishining kechikishi va qoldiq oshqozon tarkibining mavjudligi sababli aspiratsiya yoki aspiratsion pnevmoniya rivojlanish xavfi yuzaga kelishi mumkin.

Boshqa dorilar va Semavic® Next

Agar siz boshqa dorilarni qabul qilayotgan bo‘lsangiz, yaqinda qabul qilgan bo‘lsangiz yoki qabul qilishni boshlashingiz mumkin bo‘lsa, davolovchi shifokoringizga bu haqda xabar bering.

Agar siz qon ivishini kamaytirish uchun tarkibida varfarin yoki boshqa shunga o‘xshash dorilarni (og‘iz orqali qabul qilinadigan antikoagulyantlar) qabul qilayotgan bo‘lsangiz, shifokoringizga albatta aytib qo‘ying. Qonning ivish qobiliyatini aniqlash uchun sizga tez-tez qon tahlili topshirish zarur bo‘lishi mumkin.

Homiladorlik va emizish

Semavic® Next preparatini homiladorlik davrida qo‘llamang, chunki uning bo‘lajak farzandingizga qanday ta’sir qilishi noma’lum.

Semavic® Next preparatini qo‘llash davrida ishonchli kontratsepsiya usullaridan foydalaning.

Agar homilador bo‘lishni istasangiz, rejalashtirilgan homiladorlikdan kamida ikki oy oldin Semavic® Next qabul qilishni to‘xtatishingiz lozim.

Agar homilador bo‘lsangiz, homilador bo‘lishingiz mumkinligini o‘ylasangiz yoki Semavic® Next dori vositasini qo‘llash davrida farzand ko‘rishni rejalashtirmoqchi bo‘lsangiz, zudlik bilan davolovchi shifokoringizga murojaat qiling, chunki Semavic® Next bilan davolanishingizni to‘xtatish zarur bo‘ladi.h

Emizikli bo‘lsangiz, Semavic® Next preparatini qo‘llamang, chunki preparatning ona sutiga o‘tish-o‘tmasligi noma’lum.

Transport vositalarini boshqarish va mexanizmlar bilan ishlash

Semavic® Next sizning transport vositalarini boshqarish va mexanizmlardan foydalanish qobiliyatingizga ta’sir ko‘rsatmaydi. Biroq, ba’zi bemorlarda davolashning dastlabki 4 oyi mobaynida Semavic® Next preparatini qo‘llash paytida bosh aylanishi kuzatilishi mumkin (“Ehtimoliy nojo‘ya ta’sirlar” bo‘limiga qarang). Agar sizda bosh aylanishi paydo bo‘lsa, o‘zingizni yaxshi his qilmaguncha transport vositasini boshqarmasligingiz yoki mexanizmlar bilan ishlamasligingiz kerak. Qo‘shimcha ma’lumot zarur bo‘lsa, davolovchi shifokoringizga murojaat qiling.

Agar sizda QD2 bo‘lsa, Semavic® Next preparatini sulfonilmochevina hosilalari yoki insulin bilan birgalikda qo‘llaganingizda, qoningizdagi qand miqdori pasayishi mumkin (gipoglikemiya). Bu esa diqqatingizni jamlash qobiliyatingizni susaytirishi mumkin. Agar sizda gipoglikemiya belgilari paydo bo‘lsa, avtomobil boshqarmang yoki mexanizmlardan foydalanmang (qondagi qand miqdorining pasayishi xavfi haqida ma’lumot olish uchun “Maxsus ko‘rsatmalar va ehtiyot choralari” bo‘limiga, qondagi qand miqdorining pasayishi haqidagi ogohlantiruvchi belgilar uchun esa 4-bo‘limga qarang). Qo‘shimcha ma’lumot olish uchun davolovchi shifokoringizga murojaat qiling.

Kuzatuvchanlik

Preparatning kuzatuvchanligini yaxshilash uchun yuborilgan preparat partiyasining seriya raqamlari va yaroqlilik muddatini yozib qo‘yish lozim.

Yordamchi moddalar

Semavic® Next preparati bir dozada (2,4 mg) 1 mmoldan kam natriy (23 mg) saqlaydi, ya’ni deyarli natriy saqlamaydi.

Preparatni doimo davolovchi shifokor ko‘rsatmalariga to‘liq amal qilgan holda qo‘llang. Shubha tug‘ilganda, davolovchi shifokor bilan maslahatlashing.

Preparat dozasi va qabul qilish tartibini davolovchi shifokoringiz sizning individual xususiyatlaringizni inobatga olgan holda belgilaydi.

Tavsiya etilgan doza

Kattalar uchun

Tavsiya etiladigan boshlang‘ich doza haftada bir marta 0,25 mg. Tavsiya etilgan terapevtik doza haftada bir marta 2,4 mg.

Davolanishingiz boshlang‘ich dozadan boshlanadi va 16 haftalik davolanish davomida quyidagicha asta-sekin oshirib boriladi:

• Shifokoringiz sizga quyidagi jadvalda ko‘rsatilganidek, har 4 haftada dozani asta-sekin oshirishni buyuradi, toki haftada bir marta qabul qilinadigan tavsiya etilgan 2,4 mg terapevtik dozaga yetguningizcha.
• Tavsiya etilgan 2,4 mg dozaga yetganingizdan so‘ng, bu dozani boshqa oshirmang.

2,4 mg dan ortiq haftalik dozalar tavsiya etilmaydi. Davolovchi shifokoringiz davolanishingizni muntazam ravishda baholab boradi.

Bolalar va o‘smirlarda qo‘llash

Bolalar uchun samaradorligi va xavfsizligi aniqlanmagan.

Qo‘llash yo‘li va usuli

Semavic® Next preparati teri ostiga (teri osti inyeksiyasi) shprits-ruchka yordamida yuboriladi. Semavic® Next preparatini hech qachon tomir yoki mushak ichiga yubormang.

• Inyeksiya uchun eng qulay joylar bilaklar, qorin yoki sonning yuqori qismidir.
• Shprits-ruchkani birinchi marta ishlatishdan oldin, uni qanday qo‘llashni davolovchi shifokoringizdan so‘rang. Qadoqqa joylashtirilgan oldindan to‘ldirilgan ko‘p dozali bir martalik Semavic® Next shprits-ruchkasini qo‘llash bo‘yicha yo‘riqnomani diqqat bilan o‘qing. Shprits-ruchkadan faqat uni qo‘llash bo‘yicha ko‘rsatmalarga muvofiq foydalaning.
• Har doim o‘zingizga kerakli Semavic® Next dozasini ishlatayotganingizni tekshiring.

Semavic® Next preparatini haftada bir marta, imkon qadar har hafta bir xil kunda qo‘llang. Zarur bo‘lsa, oxirgi inyeksiyangizdan kamida 3 kun o‘tganidan so‘ng, ushbu preparatni haftalik qo‘llash kunini o‘zgartirishingiz mumkin. Yangi qo‘llash kunini tanlaganingizdan keyin, preparatni haftada bir marta qo‘llashda davom eting.

Siz kunning istalgan vaqtida – ovqatlanishdan qat’i nazar, o‘zingizga inyeksiya qilishingiz mumkin.

2-tur qandli diabet bilan kasallangan bemorlar

Agar sizda 2-tur qandli diabet bo‘lsa, davolovchi shifokoringizga xabar bering. Shifokoringiz qondagi qand miqdorining pasayishini oldini olish uchun 2-tur qandli diabetni davolashda qo‘llaniladigan dorilar dozasini moslashi mumkin.

• Semavic® Next preparatini teri ostiga yuboriladigan boshqa dori vositalari (masalan, insulinlar) bilan birgalikda ishlatmang.
• Semavic® Next preparatini GGP-1 retseptorlari agonistlarini o‘z ichiga olgan boshqa dori vositalari (masalan, liraglutid, dulaglutid, eksenatid yoki liksisenatid) bilan birgalikda ishlatmang.

Davolanish muddati

Shifokoringiz muntazam ravishda ahvolingizni baholab turadi va sizga Semavic® Next preparatini qancha vaqt davomida qo‘llash kerakligini aytadi.

Agar Semavic® Next preparatini keragidan ortiq dozada ishlatgan bo‘lsangiz

Zudlik bilan davolovchi shifokoringizga murojaat qiling. Sizda ko‘ngil aynish, qusish yoki ich ketish kabi oshqozon-ichak yo‘li (OIY) tomonidan nojo‘ya ta’sirlar yuzaga kelishi mumkin. Bu suvsizlanishga olib kelishi mumkin, bu esa ayrim hollarda buyrak faoliyatining yomonlashishiga sabab bo‘lishi mumkin.

Agar Semavic® Next preparatini qo‘llashni unutib qo‘ygan bo‘lsangiz

Agar dozani kiritishni unutgan bo‘lsangiz va:

• Semavic® Next inyeksiyasini qilishingiz kerak bo‘lgan vaqtdan beri 5 kun yoki undan kam vaqt o‘tgan bo‘lsa – eslaganingiz zahoti o‘tkazib yuborilgan dozani qo‘llang. So‘ngra keyingi dozani odatdagidek belgilangan kunda qo‘llang.
• Semavic® Next inyeksiyasini qilishingiz kerak bo‘lgan vaqtdan beri 5 kundan ko‘p vaqt o‘tgan bo‘lsa – o‘tkazib yuborilgan dozani qo‘llamang. Kutib turing va rejalashtirilgan kunda keyingi dozani odatdagidek qo‘llang.

O‘tkazib yuborilgan dozani to‘ldirish uchun hech qachon ikki hissa miqdorni qo‘llamang.

Agar siz Semavic® Next preparatini qo‘llashni to‘xtatgan bo‘lsangiz

Davolovchi shifokoringiz bilan maslahatlashmasdan turib Semavic® Next preparatini qo‘llashni to‘xtatmang. Agar sizda Semavic® Next preparatini qo‘llash bo‘yicha qo‘shimcha savollar tug‘ilsa, davolovchi shifokoringizga murojaat qiling.

Barcha dori vositalari kabi, Semavic® Next preparati ham nojo‘ya ta’sirlarni keltirib chiqarishi mumkin, biroq bu hol hamma bemorda ham kuzatilmaydi.

Eng jiddiy nojo‘ya ta’sirlar

Semavic® Next preparatini qo‘llashni to‘xtating va quyidagi og‘ir allergik reaksiya (anafilaktik reaksiyalar, angionevrotik shish) belgilaridan biri paydo bo‘lsa, zudlik bilan tibbiy yordamga murojaat qiling. Bunday holat kamdan-kam uchraydi (1000 kishidan ko‘pi bilan 1 nafarida kuzatilishi mumkin):

• nafas olish yoki yutishning qiyinlashuvi;
• bosh aylanishi;
• yuz, lab, til yoki tomoqning shishishi;
• terining kuchli qichishi, toshma yoki pufakchalarning paydo bo‘lishi;
• hushdan ketish oldi holati (qon bosimining tushishi) yurak urishining tezlashuvi va ko‘p terlash bilan kechishi;
• terining oqarishi va sovuqligi, bosh aylanishi yoki holsizlik.

Agar sizda 2-tur qandli diabet bo‘lsa va Semavic® Next bilan davolanish paytida ko‘pincha kuzatiladigan (10 kishidan ko‘pi bilan 1 tasida uchrashi mumkin) ko‘rish bilan bog‘liq muammolarga, masalan, ko‘rish buzilishiga duch kelsangiz, bu haqda davolovchi shifokoringizga xabar bering:

• Diabetik ko‘z kasalligining asoratlari (diabetik retinopatiya).

Agar sizda kamdan-kam hollarda (100 kishidan ko‘pi bilan 1 tasida) uchraydigan oshqozon osti bezining yallig‘lanish belgilari (o‘tkir pankreatit) kuzatilsa, darhol tibbiy yordam so‘rang:

• qorinda kuchli va uzoq davom etadigan, ba’zan orqaga tarqaluvchi og‘riq;
• butun qorin bo‘shlig‘ida to‘satdan paydo bo‘lgan kuchli og‘riqlar;
• jig‘ildon qaynashi;
• qusish xurujlari;
• qorinning dam bo‘lishi va meteorizm;
• umumiy ahvolning yomonlashuvi: tana haroratining ko‘tarilishi, qon bosimining pasayishi, yurak urishining tezlashuvi, terlash, terining oqarishi yoki sarg‘ayishi.

Semavic® Next preparatini qo‘llashda kuzatilishi mumkin bo‘lgan boshqa nojo‘ya ta’sirlar

Juda tez-tez (har 10 kishidan bittasidan ko‘prog‘ida uchraydi):

• Bosh og‘rig‘i;
• Ko’ngil aynishi;
• Qusish;
• Ich surilishi;
• Ich qotishi;
• Qorin og‘rig‘i;
• Holsizlik yoki charchoq hissi.

Tez-tez (har 10 kishidan ko‘pi bilan 1 tasida uchraydi):

• Bosh aylanishi;
• Ta’m sezishning buzilishi;
• Oshqozon buzilishi yoki hazm qilishning qiyinlashuvi;
• Kekirish;
• Ichak gazlanishi;
• Qorinning dam bo‘lishi;
• Oshqozon yallig‘lanishi (“gastrit”) - belgilari qorin og‘rig‘i, ko‘ngil aynishi yoki qusishni o‘z ichiga oladi;
• Reflyuks yoki jig‘ildon qaynashi, “oshqozon-qizilo‘ngach reflyuks kasalligi” deb ham ataladi;
• O‘t-tosh kasalligi;
• Soch to‘kilishi;
• Yuborish joyidagi reaksiyalar;
• Qandli diabet bilan kasallangan bemorlarda qondagi qand miqdorining pasayishi (gipoglikemiya)*.

^*Qondagi qand miqdorining kamayishi belgilari to‘satdan paydo bo‘lishi mumkin. Bularga quyidagilar kiradi: sovuq ter, salqin oqargan teri, bosh og‘rig‘i, yurak urishining tezlashuvi, ko‘ngil aynishi yoki kuchli ochlik hissi, ko‘rish qobiliyatining o‘zgarishi, uyquchanlik yoki holsizlik, asabiylashish, bezovtalanish yoki gangish, diqqatni jamlay olmaslik yoki qaltirash. Davolovchi shifokoringiz sizga qondagi qand miqdorini qanday oshirish va ushbu ogohlantiruvchi belgilarni sezsangiz nima qilish kerakligini tushuntiradi. Agar siz sulfonilmochevina hosilalari yoki insulin preparatlarini ham qabul qilayotgan bo‘lsangiz, gipoglikemiya ehtimoli yuqoriroq bo‘ladi. Shifokor Semavic® Next qo‘llashni boshlashingizdan oldin ushbu dorilar dozasini kamaytirib berishi mumkin.

Kamdan-kam hollarda (har 100 kishidan ko‘pi bilan 1 tasida uchraydi):

• Yurak urishining tezlashuvi;
• Qon bosimining pasayishi (gipotenziya);
• Gorizontal (o‘tirgan yoki yotgan) holatdan vertikal (turgan) holatga o‘tganda arterial bosimning pasayishi (ortostatik gipotenziya);
• Qon tahlilida lipaza va amilaza darajalarining ko‘tarilishi;
• Oshqozonning sekin bo‘shashi.

Juda kam hollarda (har 1000 kishidan ko‘pi bilan 1 tasida uchraydi):

• Ichak tutilishi
• Xolangit
• Xolestatik sariqlik

Agar sizda yangi alomatlar paydo bo‘lsa yoki mavjud alomatlar kuchaysa, davolovchi shifokoringizga xabar bering.

Nojo‘ya ta’sirlar haqida xabar

Agar sizda nojo‘ya ta’sirlar paydo bo‘lsa, shifokor bilan maslahatlashing. Ushbu tavsiya har qanday mumkin bo‘lgan nojo‘ya ta’sirlarga, shu jumladan ichki varaqada ko‘rsatilmagan ta’sirlarga ham taalluqlidir. Shuningdek, nojo‘ya ta’sirlar haqida Yevroosiyo Iqtisodiy ittifoqiga a’zo davlatlarning xabar berish tizimi orqali to‘g‘ridan-to‘g‘ri ma’lum qilishingiz mumkin. Nojo‘ya ta’sirlar haqida xabar berib, siz dorining xavfsizligi to‘g‘risida ko‘proq ma’lumot to‘planishiga yordam berasiz.

Rossiya Federatsiyasi
Sog‘liqni saqlash sohasidagi nazorat bo‘yicha Federal xizmat (Roszdravnadzor) Manzil: 109012, Moskva, Slavyanskaya maydoni, 4-uy, 1-bino
Telefon: +7 800 550 99 03
Elektron pochta: pharm@roszdravnadzor.gov.ru
Internet axborot-telekommunikatsiya tarmog‘idagi veb-sayt: www.roszdravnadzor.gov.ru

Semavic® Next preparatini bolalar ko‘rmaydigan va ular yeta olmaydigan joyda saqlang.

Shprits-ruchka yorlig‘ida va o‘ramida ko‘rsatilgan yaroqlilik muddati (saqlash muddati) o‘tgandan so‘ng Semavic® Next preparatini ishlatmang. Yaroqlilik muddati tugash sanasi ushbu oyning oxirgi kuni hisoblanadi.

Semavic® Next preparatini sovutgichda 2 °C dan 8 °C gacha haroratda saqlang.

Muzlatmang, muzxona yaqiniga qo‘ymang, agar preparat muzlagan bo‘lsa, ishlatmang.

Birinchi marta ishlatilgandan so‘ng

Ishlatiladigan yoki zaxira sifatida olib yuriladigan preparatli shprits-ruchkani 30 °C dan yuqori bo‘lmagan haroratda yoki 2 °C dan 8 °C gacha bo‘lgan haroratda (muzlatgichda) 6 haftadan ortiq bo‘lmagan muddat davomida saqlang.

Muzlatmang. Ishlatgandan so‘ng, shprits-ruchkani yorug‘likdan himoyalash uchun qalpoqcha bilan yoping. Ortiqcha issiqlik ta’siridan saqlang.

Agar eritma tiniq va rangsiz bo‘lmasligini sezsangiz, Semavic® Next preparatini ishlatmang.

Preparatni kanalizatsiyaga tashlamang (to‘kmang). Dorixona xodimidan endi kerak bo‘lmaydigan preparatni qanday yo‘q qilish kerakligini so‘rab biling. Bu choralar atrof-muhitni himoya qilishga yordam beradi.

Semavic® Next preparati tarkibida

Faol modda semaglutiddir.

Semavic® Next, 0,25 mg/doza, teri ostiga yuborish uchun eritma

Har bir ml eritmada 0,68 mg semaglutid mavjud. Oldindan to‘ldirilgan har bir shprits-ruchkada 3 ml eritmada 2,04 mg semaglutid (0,25 mg dan 8 ta doza) bor.

Boshqa tarkibiy qismlar: dinatriy gidrofosfat digidrat, propilenglikol, fenol, xlorid kislotasining 10 % li eritmasi yoki natriy gidroksidning 10 % li eritmasi (pH ni moslashtirish uchun), inyeksiya uchun suv.

Semavic® Next, 0,5 mg/doza, teri ostiga yuborish uchun eritma

Har bir ml eritmada 1,34 mg semaglutid mavjud. Oldindan to‘ldirilgan har bir shprits-ruchka 3 ml eritmada 4 mg semaglutid (0,5 mg dan 8 ta doza) o‘z ichiga oladi.

Boshqa tarkibiy qismlar: dinatriy gidrofosfat digidrat, propilenglikol, fenol, xlorid kislotasining 10 % li eritmasi yoki natriy gidroksidning 10 % li eritmasi (pH ni moslashtirish uchun), inyeksiya uchun suv.

Semavic® Next, 1 mg/doza, teri ostiga yuborish uchun eritma

Har bir ml eritmada 1,34 mg semaglutid mavjud. Oldindan to‘ldirilgan har bir shprits-ruchka 3 ml eritmada 4 mg semaglutid (1 mg dan 4 ta doza) o‘z ichiga oladi.

Boshqa tarkibiy qismlar: dinatriy gidrofosfat digidrat, propilenglikol, fenol, xlorid kislotasining 10 % li eritmasi yoki natriy gidroksidning 10 % li eritmasi (pH ni moslashtirish uchun), inyeksiya uchun suv.

Semavic® Next, 1,7 mg/doza, teri ostiga yuborish uchun eritma

Har bir ml eritmada 2,27 mg semaglutid mavjud. Oldindan to‘ldirilgan har bir shprits-ruchka 3 ml eritmada 6,8 mg semaglutid saqlaydi (1,7 mg dan 4 ta doza).

Boshqa tarkibiy qismlar: dinatriy gidrofosfat digidrat, propilenglikol, fenol, xlorid kislotasining 10 % li eritmasi yoki natriy gidroksidning 10 % li eritmasi (pH ni moslashtirish uchun), inyeksiya uchun suv.

Semavic® Next, 2,4 mg/doza, teri ostiga yuborish uchun eritma

Har bir ml eritmada 3,2 mg semaglutid mavjud. Oldindan to‘ldirilgan har bir shprits-ruchka 3 ml eritmada 9,6 mg semaglutid saqlaydi (2,4 mg dan 4 ta doza).

Boshqa tarkibiy qismlar: dinatriy gidrofosfat digidrat, propilenglikol, fenol, xlorid kislotasining 10 % li eritmasi yoki natriy gidroksidning 10 % li eritmasi (pH ni moslashtirish uchun), inyeksiya uchun suv.

Semavic® Next preparati tarkibida natriy mavjud (2-bo‘limga qarang)

Semavic® Next preparatining tashqi ko‘rinishi va qadoq tarkibi

Semavic® Next teri ostiga yuborish uchun mo‘ljallangan eritma rangsiz yoki deyarli rangsiz, tiniq suyuqlikdir.

3 ml dan neytral shishadan tayyorlangan rangsiz shisha kartrijlarga (1-gidrolitik toifa) quyiladi. Kartrijlar brombutil kauchukdan yasalgan rezina plunjerlar bilan jihozlangan bo‘lib, alyuminiy va brombutil kauchukli rezina diskli qo‘shma qalpoqchalar bilan muhrlanadi.

Kartridj 0,25/0,5/1,0/1,7/2,4 mg/doza miqdorida dori yuborishga mo‘ljallangan ko‘p martalik inyeksiyalar uchun plastik bir martalik ko‘p dozali shprits-ruchkaga o‘rnatiladi. Har bir shprits-ruchkaning korpusiga polipropilen plyonkadan tayyorlangan yorliq yopishtiriladi.

Ko‘p martalik inyeksiyalar uchun oldindan to‘ldirilgan 1 ta ko‘p dozali bir martalik shprits-ruchka va shprits-ruchkadan foydalanish bo‘yicha yo‘riqnomani o‘z ichiga olgan ilova-varaqa bilan 4 ta bir martalik ignani o‘z ichiga olgan 1 ta karton quti karton qadoqqa joylashtiriladi.

Ro‘yxatdan o‘tkazish guvohnomasi egasi

Rossiya Federatsiyasi OOO “GEROPHARM”
191119, Sankt-Peterburg shahri, Zvenigorodskaya ko‘chasi, 9-uy Tel: +7 (812) 703 79 75 (ko‘p kanalli)
Faks: +7 (812) 703 79 76
Elektron pochta: inform@geropharm.ru

Производитель

Rossiya Federatsiyasi OOO “GEROPHARM”
1. Moskva viloyati, Serpuxov shahri okrugi, Obolensk qishlog‘i, A kvartali hududi, 5-bino
2. Moskva viloyati, Serpuxov shahri okrugi, Obolensk qishlog‘i, A kvartali hududi, 1-korpus, 5-bino
3. Moskva viloyati, Serpuxov shahri, Obolensk qo‘rg‘oni, A kvartali hududi, 82-korpus, 4-bino

Iste’molchilarning barcha e’tirozlari ro‘yxatdan o‘tkazish guvohnomasi egasining vakiliga yoki ro‘yxatdan o‘tkazish guvohnomasi egasiga yuborilishi lozim:

Rossiya Federatsiyasi OOO “GEROPHARM”
196608, Sankt-Peterburg shahri, Pushkin shahri, Yachevskiy yo‘li, 4-uy, 1-bino. Tel: +7 (812) 703 79 75
Faks: +7 (812) 703 79 76
Elektron pochta: inform@geropharm.ru; farmakonadzor@geropharm.com

Boshqa ma’lumot manbalari

Ushbu dori vositasi haqidagi batafsil ma’lumotlar Ittifoqning https://eec.eaeunion.org/ veb-saytida joylashtirilgan